Wednesday, March 21, 2012

அமெரிக்காவின் தீர்மானத்தில் இந்தியா திருத்தம் செய்யும் ? - கொழும்பு ஊடகம் தகவல்


சிறிலங்காவுக்கு எதிராக ஐ.நா மனிதஉரிமைகள் பேரவையில் அமெரிக்கா முன்வைத்துள்ள தீர்மானத்தில், இந்தியா திருத்தங்களை செய்வதற்குத் தலையிடும் என்று இராஜதந்திர வட்டாரங்களை மேற்கோள்காட்டி கொழும்பு ஆங்கில ஊடகம் ஒன்று தகவல் வெளியிட்டுள்ளது. 

இந்தத் தீர்மானம் வாக்கெடுப்புக்கு விடப்படுவதற்கு முன்னதாக, அதில் இந்தியா திருத்தங்களை மேற்கொள்ளும் என்று சிறிலங்கா இராஜதந்திரிகள் நம்பிக்கை வெளியிட்டுள்ளனர். 

அதேவேளை, 13வது திருத்தத்துக்கு அப்பாற்பட்ட அரசியல்தீர்வு ஒன்றை நடைமுறைப்படுத்து குறித்தும் ஜெனிவா தீர்மானத்தில் உள்ளடக்க இந்தியா விரும்புவதாக நம்பத்தகுந்த வட்டாரங்கள் தெரிவித்ததாக கொழும்பு ஊடகம் மேலும் தகவல் வெளியிட்டுள்ளது. 

இதனிடையே ஐ.நா மனிதஉரிமைகள் பேரவையில் அமெரிக்கா முன்வைக்கும் சிறிலங்காவுக்கு எதிரான தீர்மானம் குறித்து சிறிலங்கா வெளிவிவகார அமைச்சர் ஜி.எல்.பீரிசுடன் கலந்துரையாடுமாறு ஜெனிவாவிலுள்ள தனது நிரந்தர பிரதிநிதியை இந்தியா அறிவுறுத்தியுள்ளது. 

இந்திய வெளிவிவகார அமைச்சர் எஸ்.எம். கிருஸ்ணாவுடன் சிறிலங்கா வெளிவிவகார அமைச்சர் பீரிஸ் நேற்றுக்காலை சுமார் 20 நிமிடங்கள் தொலைபேசி மூலம் கலந்துரையாடியிருந்தார். 

இதையடுத்தே இந்த அறிவுறுத்தல் இந்தியப் பிரதிநிதிக்கு வழங்கப்பட்டுள்ளதாகத் தெரிகிறது. 

உள்நாட்டு அரசியல் அழுத்தங்கள் காரணமாகவே, சிறிலங்காவுக்கு எதிரான தீர்மானத்தை ஆதரிக்க வேண்டிய நிலை ஏற்பட்டுள்ளதாக இந்திய வெளிவிவகார அமைச்சர் எஸ்.எம்.கிருஸ்ணா கூறியதாக ஜெனிவாவிலுள்ள சிறிலங்கா இராஜதந்திரி ஒருவர் தெரிவித்துள்ளார். 

இதற்கிடையே, மற்றொரு கொழும்பு ஆங்கில ஊடகம், நாளை காலை அல்லது மதியத்துக்கு சற்று பின்னதாக சிறிலங்காவுக்கு எதிரான தீர்மானம் குறித்த வாக்கெடுப்பு நடைபெறும் என்று தகவல் வெளியிட்டுள்ளது. 

Reactions:

0 கருத்துரைகள் :

Post a Comment